2 Keunenks 06
01Op n dag zeden lu van profetenploug tegen Elisa: "t Stee doar wie mit joe touholden is te klaain veur ons aalmoal, dat zai ie ja wel.
02Loat we noar Jordaan goan en doar boomstammen hoalen, dat wie n nij onderkommen baauwen." "Goat joen gang!" zee Elisa.
03Der was ain dij zee: " t Zol mooi wezen, meneer, as ie mitgingen." "Goud," zee Elisa.
04Hai ging mit heur noar Jordaan en doar begunden ze te boomkappen.
05Dou ze doar mit in schrip wazzen, vloog bie ain van profeten biel tou stoal oet en vuil in t wotter. Hai gaf n gilp en raip: "Dat is mie ook wat, meneer! k Haar hom laind!"
06"Woar is e hènvalen?" vruig godsman. Dou man hom t stee aanwezen haar, snee Elisa n toek òf en smeet dij in t wotter. Biel kwam dou bovendrieven.
07"Hoal hom der mor oet," zee e en man pakte hom tou t wotter oet.
08Keunenk van Aram was weer ais in oorlog mit Israël. Ieder bòt as e mit zien aanvoerders in beroad was en zee: "Op dit of dat stee zel we ons legern,"
09luit godsman Elisa keunenk van Israël woarschaauwen: "Paas op, dat ie doar votblieven, omreden Arameeërs willen doar aanvalen."
10 Den stuurde keunenk van Israël gounent noar t stee dij godsman hom nuimd haar en woarschaauwde lu doar. Zulm bleef e doar oet de buurt. En dat gebeurde nait ain of twij moal.
11 Keunenk van Aram aargerde zok doar vrezelk aan. Hai luit zien aanvoerders kommen en vruig heur: "Veur n droad ter mit: wèl van ons holdt t mit keunenk van Israël?"
12 Ain van aanvoerders zee: "Haildaal gainain, meneer de keunenk. Mor dij profeet Elisa in Israël, dij wait keunenk van Israël alderdeegs te vertellen wat ie in joen sloapkoamer zeggen!"
13 "Goa kieken woar of e touholdt!" zee keunenk dou. "Den loat ik hom oppakken." Dou meldden ze hom: "In Dotan zit e!"
14 Hai stuurde der n staark leger hèn mit peerden en striedwoagens.
Snaachts kwammen Arameeërs der aan en sloten stad haildaal in.
15 Knecht van godsman was aanderdoagsmörgens bietieds van bèr ofgoan en dou e boeten kwam, zag e rondomheer stad n leger mit peerdenwoagens. Hai noar Elisa: "Wat mout we nou, meneer?"
16 "Wees mor nait benaauwd," zee Elisa. "Wie hebben meer achter ons stoan as zai!"
17 En Elisa beedde: "HEER, dou hom de ogen lös, dat e t zain kin." De HEER dee knecht zien ogen open en zie dèr: haile baarg vol peerdenwoagens van vuur, rondom Elisa tou!
18 Dou Arameeërs op Elisa ofkwammen, beedde hai de HEER: "Loat aal dat volk opslag blind worden!" En dat gebeurde, krekt as Elisa vroagd haar.
19 Dou zee Elisa tegen heur: "Ie hebben joe mishad, hur! Dit is stad nait doar ie wezen mouten. Kom mor achter mie aan, den breng ik joe noar man tou doar joe t om te doun is." Zo brochde hai heur noar Samaria tou.
20 Doar aankommen, beedde hai: "HEER, dou heur de ogen lös, dat ze weer zain kinnen!" De HEER dee heur de ogen open: midden in Samaria zitten ze!
21 Dou keunenk van Israël heur zag, zee e tegen Elisa: "Zel k ze doodsloagen, voai, zel k dat doun?"
22 "Nee," zee Elisa, "ie sloagen gainain dood! Dij ie vangen mit joen aigen sweerd en pielenboog sloag ie toch ook nait dood? Zet heur mor brood en wotter veur, den kinnen ze eten en drinken en noar heur heer weeromgoan."
23 Dat zodounde luit hai n best moal veur heur kloarmoaken en dou ze eten en dronken haren, stuurde hai heur noar heur heer weerom. Van dou òf aan kwammen Aramese bendes nait meer in Israël.
24 n Zetje loater raip keunenk Benhadad van Aram zien haile leger bie mekoar. Hai rukte op en belegerde Samaria.
25 t Beleg duurde zo laank, dat ter in stad n vrezelke hongersnood kwam. t Wer zo slim dat n ezelskop tachteg sjekel zulver dee en n pond doevemis vief.
26 Dou keunenk van Israël n moal over stadsmuur laip, raip n vraauw noar hom: "Help mie toch, meneer de keunenk!"
27 Hai zee: "As de HEER joe nait helpt, woar zel ik den hulp vandoan hoalen? Van dörsdeel of droevepaars meschain?
28 Mor wat scheelt ter aan?" Zai gaf beschaaid: "Dizze vraauw zee tegen mie: 'Stoa dien kind nou òf. Den eet wie dij vandoag op en den mörgen mienent.'
29 Zo heb wie mien kind kookt en opeten, mor dou ik aanderdoags tegen heur zee: 'Geef dien kind nou, dat wie hom opeten,' het ze heur kind beziedstopt."
30 Bie t heuren van vraauw heur verhoal scheurde keunenk zien klaaier ondertussen dat e op stadsmuur laip. En t haile volk zag dou dat hai doaronder op t blode vèl raauwgoud druig.
31 Keunenk raip: "God mag mie k-wait-nait-wat doun as kop van Elisa, Safat zien zeun, der vanoavend nog op zit!"
32 Nou was Elisa thoes en oldsten zatten bie hom. Keunenk stuurde ain noar hom tou. Mor nog veurdat dij der was, zee Elisa tegen oldsten: "Wait ie wel dat dij dikke moordenoar ain stuurd het om mie kop òf te haauwen? Paas op, dou deur op slöt as dij man der aan komt en hol hom tegen! En heur k zien boas nait stoef achter hom aan kommen?"
33 Hai was nog mit heur aan proat, of doar kwam keunenk al aan. "Aal dizze ellèn komt van de HEER vandoan," zee e. "Woarom zel k nog laanger op hom hopen?"
|
